2. Benefizkonzert, Mittwoch, 4. Dezember 2024, 19.30 Uhr Pfarrkirche Hergiswil

Singen für einen guten Zweck, in einer besonderen Zeit und in einer verrückten Welt, vermag die Leute zu sensibilisieren. Ganz inbrünstig, es tönte fast wie ein Hilferuf himmelwärts, als die rund 60 Joderinnen und Jodler sangen: «Miädi Wält stand uif sing mit».

«Wiehnachtsglogge» werden in Bälde läuten. Dieses Thema griff der vor Kurzem zum höchsten Zentralschweizer Sozialdirektor gewählte Nidwaldner Regierungsrat Peter Truttmann auf. Wir übermitteln an dieser Stelle seine Grussbotschaft:

Liebe Jodlerinnen vo de Jodlergruppe Chriensertal, liebi Fraije und Mannä vom Jodlerklub Echo vom Pilatus und vom Jodlerklub Alpnach,
liäbi Musigfrind, liäbi Gescht
und ganz besonders liäbi Silvia Windlin, dui bisch ä belzigi.

Es isch mier wieder ä bsunderi Freid und Ehr, Sie alli hit Abig zu eysem Benefizkonzärt i der Pfarrchilä vo Hergiswil willkomme z’heissä. Wiä scheen isch es doch, i derä fäschtlichä Zeyt zämä z’cho, um Freid und Muisig z’teilä und derbiä firne wichtigi Sach iz’stah. Dankä Silvia, dass ich hit scho zum dritte Mal das darf mache, und ich mach es sehr gärä.

Gid es äs Bild, wo meh inspiriärd als das, wo mier etz hiä aträffid a dem Mittwuchabig? Mänschä, wo gmeinsam und i Vorfreid ufä Adväntsabig ihri Härzä uiftiänd und sich fir anderi i-setzid. Passend derzue hed eys s’Liäd «Wiehnachtsglogge» vom Ernst Sommer musikalisch begriässt. I derä Iladig, mit Gloggegleyt, gahd äs eych da gleych? Simmer nid alli imenä Dorf oder inere Stadt uifgwachse und drheime, wo eys s'Gloggegleyt vertruit isch? ja sogar so, dass ich sägä, dass das vo meym Dorf am scheenschtä isch? Seygs am Morgä friäh, oder am Elfi, oder am drey am Namitag? Mängisch macht's eim Freid, gid fascht ä chley Heiwehgfihl, und mängisch ghert's zuemene truirigä Momänt. Im Gloggegleyt, i Verbindig mit Muisig, fir Begägnigä oder fir Mänschä – hit wieder für Chind wo chrank oder i Not sind – liggid wundervolli Gedanke, wo eys hit begleitid.

Advänt isch ä bsunderi Zeyt: ä Zeyt vo Cherzäliächt und Liäder der Bsinnig, aber ai ä Zeyt vom Wartä. Wartä isch ä Kunscht, wo-n-eys lehrä cha, Geduld z’iäbä und offä z’sey. Mier wartid nid nur uf Wiähnachtä, sondern uf all diä chleynä und grossä Wunder vom Läbä. Hit am Abig derfid mier erläbä, we Muisig diä Momänt vom Wartä mid Sehnsucht, Dankbarkeit und Freid erfilld.

Ich bi uberzeygt, dass diä hittigä muisikalischä Darbiätigä eysi Härzä einisch meh beriährä wärdid. Sie inspiriärid eys villeicht derzue, dass Wiähnachstsgfihl, wo mier hit gspirid, mitnähmid i Alltag uisä - und das s’ganz Jahr durä. Denn es gid immer wieder Glägäheitä, mid anderne verbundä z’bleybä und sich für diä i-z’setzä, wo’s nid eso ring im Läbä hend.

Eyses hittigi Konzärt hed ä wichtigi Grund: mier wettid dä Chind im Luzärner Chinderspital hälfä, ganz bsunders i denä wo a Chräbs erchrankt sind, und mier mechtid ai diä wärtvolli Arbeit vo der Stiftig Theodora unterstitzä. Diä Traimdekter schänkid denä chleynä Paziäntä Momänt vo der Liächtigkeit, wo sie eifach nur Chind sey derfid - losgleest vo Sorgä und Chranket. Und mier wend ai d’Chinderspitex Zäntralschweyz understitzä.

Mid eycherä grosszigigä Tirkollektä, trägid Sie derzue bey, bsunderigi Begägnigä und anders fir Chind meglich z’machä. Da derfir dank ich Ihnä vo Härzä.

Liäbi Silvia, ich weiss, Dui stahsch nid gärä im Mittelpunkt, aber hit am Abig dank ich dier nu einisch ganz fest,  fir d’Organisation vo dem Konzärt und ai fir das vom letschte Sunntig i de Kollegi Chile z’Sarnä und das vom 15. Dezämber i der Franziskanerchilä z’Luzärä. Deys Engagement und dey Liäbi zur Muisig und zu de Mänschä schänkid eys dä Abig.

Eych allnä winsch ich ä wunderbari Adväntszeyt und nachem Konzärt ä gueti und sicheri Hei-reis. Und wenn iär s'nechscht Male Glogge gherid leyte, de dänkid zrugg a dä wunderbari Abig hiä i der Hergiswiler Chilä, wo em hl. Nikolaus von Myra gweiht isch.

Jetzt aber lend mier eys la verzaibere vo denä Kläng vom Liäd «E gschänkte Tag», vom Adolf Stähli, vortreid vom Jodlerklub «Echo vom Pilatus».

Ich weyschä ä gsägnete Abig!

Peter Truttmann, 2.12.2024